Sjip, Lumer en di ual Sölring Hüsmarken
(Maren Jessen)
Üp di Ailönen bi di Nuurdseeküst en aliksa üp Söl waar ön`t 17. Jaarhönert jit ales, wat en Hüs töjert, me en Hüsmark teekent. Ön histoorisk Āpteeknings ken em lees, dat didiarem Hüsmarken üt sa neemt „Handgemalen“, diar me en Knif iinön en Steev snitset waar, önstönen sen. Man bluat di Ialst fan en Sip maast di Mark föör. Leeterhen maast uk danen, diar bit hentö di fjuurst Graad blörfrinj en diartö jit Grünbiseter wiar, didiarem Mark nüti.
Me didiarem Hüsmark waar sawel dit Hüs en dit Ingur üs uk dit Tjüch en di Ingis en Eekern teekent. Dit Hüsmarkenforteekning fan di Büürfööger wiar iipen tö arkenjen. Diarme dit üp Söl niin Forweksling jaav, her arkenjen di jest Boksteev fan sin Terpsnoom me ápföört, wan hi en Önerskreft me di Hüsmark laisti skul. Didiarem Mark bleev bi`t Hüs en ging aur tö di naist Biseeter.
Üüs Kroonist C. P. Hansen fuan di ialst Sölring Hüsmark ön en Koopbreev fan 1609. Peter Jensen fan Tinem forkoopet jer sin Hüs me di Stööwen, en hualef Tost (en Stek iinhainet Lön, wat dit Hüs töjert), en Kwern en fjuur Sjip tö Erik Früdden fuar 80 Riksdaalers. Tö di Önerskreft waar altert uk di Hüsmark, somtirs uk üp en Seegel, ápföört.
Didiarem Marken wiar binai likdeling me Ruunen. Hat jaav iinfach Streeken en uk könstfol Maaksel. Bisir Winkel- en Triikantfuaremer kür em iinfach Krütsen, man uk öndüüdet Dingen finj, diar wat aur di Bruarweening fan di Biseeter ütsii kür. Tö Bigen fan`t 18. Jaarhönert waar di Hüsmarken üs Önerskreft ek muar aaft nütet, man üs Teeken bi di Sjip en Diirter en Eekern en Feenen waar`t fiiler brükt.
Üp Söl her höm ön ualing Tiren jit muar Feenen üs Eekern, hur em Beri, Hirsi, Haawer en Flaaks önbecht, en sa stön di Āptocht fan Sjip ön di Fuargrün. Sjip lööwert Meet, Molk, Aast en ek töleest Ül. Di Sölring Kroonist Henning Rinken (1777-1862) skreft, dat di Sölring 1836 sa ombi 20.000 Pün Ül tö Kluaring foraarbert haa.
Man di Āptocht fan Kraiter fing ön`t 19. Jaarhönert uk en gurter Bidüüding. Bit hentö 1924 jaav dit üp Söl fan di 11. Nowember bit hentö di 1. Aprilmuun dit sa neemt „Friilaapen“. Ön des Tir maast arkenjen sin Tjüch üp di Feenen, wat di Gimiindi töjert, geersi let.
Dat di ual Hüsmarken tö Bigen fan`t 20. Jaarhönert üs Teeken fuar`t Tjüch jit ek auriiten wiar, ken wü bi üüs Skuulmaister en Haimaatforsker Hermann Schmidt (1901-1979) lees. Hi skreft: „Wan`t Uurs waar en dit „Luaslaapen“ di 1. April sin Jen her, waar di Sjip fan di Weesterlöning Buuren iin ön en gurt Feen drewen. Jir waar di Ramer, diartö ali Jaarlumer en di Sjip, wat niin Lumer her, ütsaacht en ön en naist Feen iinsperet. Ja wiar diartö ütsaacht, di Somer aur ön Dünemer fan Hörnem ön Friihair tö geersin. Ark, diar Sjip diarmung her, maast danen bi di Man fan Raantem önmel, diar diaraur tö waakin her, dat ales törocht kám, aur höm di Geersing jert. Ark Diirt her sin Uarmark, en diarme wust em, hoken dit töjert. En da her ark Diirt en Buurtji me en Stek Toom om Hals bünen. Didiar Buurtjis wiar ön ualing Tiren eeder di Hüsmarken fan ark Hüs fastlair uuren en danen jert langsen tö dit Hüs en ek tö di Lir, diar dit Hüs jert. Wan ali Sjip eeder Tal en Aart ápskrewen uuren wiar, skul dit Driiwen üt tö Hörnem luasgung, diarhen, hur ja hen tö Harefst ön Friihair geersi skul“.
Schafe, Lämmer und die alten Sylter Hausmarken
(Deutsche Übersetzung von Maren Jessen)
Auf den Inseln der Nordseeküste und ebenso auf Sylt wurde im 17. Jahrhundert noch alles, was zu einem Anwesen gehörte, mit einer Hausmarke gekennzeichnet. In historischen Aufzeichnungen kann man lesen, dass diese Hausmarken aus sogenannten „Handgemalen“, die mit einem Messer in Stäbe hineingeschnitzt wurden, entstanden sind. Nur der Älteste einer Sippe durfte diese Marke führen. Später durften auch diejenigen, die bis zum vierten Grad blutsverwandt und dazu noch Grundbesitzer waren, die Marke nutzen.
Mit dieser Hausmarke wurden sowohl das Haus und die Einrichtung als auch das Vieh und die Wiesen und Äcker gekennzeichnet. Das Hausmarkenverzeichnis des Bauernvogtes war jedem zugänglich. Um auf Sylt Verwechslungen zu vermeiden, hatte jeder den Anfangsbuchstaben seines Dorfnamens hinzugefügt, wenn er eine Unterschrift mit der Hausmarke leisten musste. Die Marke blieb am Hause und ging über auf den nächsten Besitzer.
Unser Chronist C. P. Hansen fand die älteste Sylter Hausmarke in einem Kaufbrief von 1609. Peter Jensen aus Tinnum verkaufte damals sein Haus mit Staven, einem halben Tost (ein Stück eingefriedetes Land dicht am Haus), einer Handmühle und vier Schafen an Erik Früdden für 80 Reichstaler. Zu der Unterschrift wurde stets auch die Hausmarke, manchmal auch mit einem Siegel, aufgeführt.
Diese Marken waren den Runen ähnlich. Es gab einfache Linien, aber auch kunstvolle Gebilde. Neben Winkel- und Dreikantformen konnte man einfache Kreuze finden, jedoch auch angedeutete Gegenstände, die etwas über den Beruf des Besitzers aussagen konnten. Zu Beginn des 18. Jahrhunderts verloren die Hausmarken als Unterschrift an Bedeutung, jedoch für die Kennzeichnung der Schafe und Rinder sowie der Äcker und Wiesen wurden sie weiter genutzt.
Auf Sylt hatte man früher noch mehr Weideland als Äcker, auf denen man Gerste, Hirse, Hafer und Flachs anbaute und so stand die Schafzucht im Vordergrund. Schafe lieferten Fleisch, Milch, Käse und nicht zuletzt Wolle. Der Sylter Chronist Henning Rinken (1777-1862) schreibt, dass die Sylter Bevölkerung im Jahre 1836 ca. 20.000 Pfund Wolle zu Kleidung verarbeitet hat.
Jedoch die Rinderzucht bekam im 19. Jahrhundert auch größere Bedeutung. Bis 1924 existierte auf Sylt vom 11. November bis zum 1. April die sogenannte „Freie Weide“. In dieser Zeit durfte jeder sein Vieh auf den Gemeindewiesen grasen lassen.
Dass die alten Hausmarken zu Beginn des 20. Jahrhunderts als Kennzeichnung des Viehs noch nicht vergessen waren, können wir bei unserem Lehrer und Heimatforscher Hermann Schmidt (1901-1979) lesen. Er schreibt: „Wenn es Frühling wurde und die sogenannte „Freie Weide“ am 1. April ein Ende hatte, wurden die Schafe der Westerländer Bauern auf eine große Wiese getrieben. Hier wurden die Böcke, dazu die einjährigen Lämmer und die Schafe, die keine Lämmer hatten, aussortiert und in der nächsten Weide eingesperrt. Sie waren dazu ausgesucht, den Sommer über in den Hörnumer Dünen in Freiheit zu grasen. Jeder, der Schafe dazwischen hatte, musste diese bei einem Mann aus Rantum anmelden, der darüber zu wachen hatte, dass alles rechtens war, da ihm das Weidegebiet gehörte. Jedes Tier hatte seine Ohrmarke, die kenntlich machte, wem es gehörte. Und dann hatte jedes Tier ein Brettchen mit einem Stück Seil um den Hals gebunden. Diese Brettchen waren in alten Zeiten nach den Hausmarken jedes Hauses festgelegt worden und diese gehörten stets zum Haus, nicht zu den jeweiligen Besitzern. Wenn alle Schafe nach Anzahl und Geschlecht aufgeschrieben worden waren, sollte das Treiben nach Hörnum beginnen, dorthin, wo sie bis zum Herbst in Freiheit grasen sollten“.